NTNU og UiO på topp i Norden
NTNU hamnar på 4. plass og Universitetet i Oslo på 6. plass på ei rangering over dei universiteta i Europa som er mest synlege på web.
I Norden tar NTNU og UIO dei to øvste plassane, mens Harvard er verdas beste universitet. Det viser januarmålinga til den spanske forskargruppa Webometrics.
Det er universiteta i Cambridge og Oxford som tar gull og sølv på det spanske byrået Webometrics januarrangering av dei universiteta i Europa som er mest synlege på webben. Rangeringa blei offentleggjort i går.
To norske før det beste svenske
På tredjeplass ligg det sveitsiske toppuniversitetet ”Swiss Federal Institute of Technology i Zürich, rett over NTNU på fjerdeplass. Klemt mellom NTNU og Universitetet i Oslo ligg University of Edinburgh på ein femteplass. Helsingfors universitet tar åttandeplassen, medan Kungliga tekniska høgskolan i Stockholm er på 18.plass og Uppsala universitet endar på ein 21. plass. På denne rangeringa er altså NTNU og UiO dei to beste universiteta i Norden.
Amerikanske universitet på topp
På verdsrangeringa ligg dei to sistnemnde universiteta på 49. og 55. plass. Det vil seia at NTNU har klatra opp fem plassar sidan julirangeringa, og det har dermed rykka litt frå UiO, som tangerer plasseringa si frå i fjor. På toppen ligg det amerikanske firkløveret Harvard, Massachussets Institute of Technology, Stanford og Berkeley. Det beste ikkje-amerikanske universitetet er Cambridge på 27. plass.
Universitetet i Bergen er nummer 36 og tangerer dermed plasseringa frå juli-rangeringa til Webometrics. Københavns Universitet gjer det heller dårleg, og hamnar som nummer 47.
Inkluderer webindikatorar
Webometrics blir publisert av den spanske forskargruppa Internet Lab. Den er knytt til Spanias forskingsråd og informasjonssenter om forsking og utdanning.
Forskarane var veldig overraska over å oppdaga at webindikatorar mangla heilt i evalueringa av universiteta på andre rankinglister. Dei meiner at å vera til stades på Internett betre reflekterer ei stor gruppe variablar som er med i hovudoppgåvene til eit universitet, nemleg undervisning, forsking og kunnskapsformidling.
Når rankinglista blir sett opp, blir det tatt mest omsyn til kor mange forskingsartiklar kvart universitet har tilgjengeleg på Internett. Men dei tar også med tilbodet av digitale bibliotek, databasar, digitale kurs og bidrag på internasjonale forskarkonferansar.
Kilde: Universitetsavisa
