Nordlandsforskning og Kunnskapsparken i Bodø har evaluert statens tilskot til Ungt Entreprenørskap. Evalueringa viser at Ungt Entreprenørskap tilbyr ei stor mengde program med høg kvalitet. Organisasjonen er slank og veldrive i høve til storleiken på tilskotet og talet på elevar organisasjonen når. I 2010 var over 150 000 elevar og studentar med i ulike aktivitetar i regi av Ungt Entreprenørskap.

- Eg er oppteken av at det er eit rikt mangfald av arbeidsplassar over heile landet. For å få det til, treng me mange med pågangsmot og stå-på-vilje som vel å starte sine eigne bedrifter. Eg er imponert over engasjementet, kreativiteten og motet som Ungt Entreprenørskap er med og utløyser hos unge skaparar, seier kommunal- og regionalminister Liv Signe Navarsete.

- Å legge til rette for entreprenørskap og nyetablering er avgjerande for nyskaping og økonomisk vekst. Eg trur at det mest effektive verkemiddelet for å skape ein sterk entreprenørskapskultur er å satse på entreprenørskap i utdanninga. Eg er svært glad for at Ungt Entreprenørskap i så sterk grad gjev kompetanse og inspirasjon til potensielle ”grunderspirer”, seier nærings- og handelsminister Trond Giske.

I 2009 la KD, NHD og KRD fram ein handlingsplan for entreprenørskap i utdanninga. Regjeringa ønskjer å styrke kvaliteten og omfanget av entreprenørskapsretta opplæring innanfor alle nivå og fagområde i utdanningssystemet. Ungt Entreprenørskap er ein viktig aktør i dette arbeidet.

Ungt Entreprenørskap er ein fri og uavhengig organisasjon som arbeider aktivt saman med skular og utdanningsinstitusjonar for å gjere sitt til at alle elevar og studentar får eit tilbod om opplæring i entreprenørskap. Aktiviteten har vakse kraftig etter at organisasjonen vart etablert i 1997. Ungdomsbedrift vert i dag tilbydd på over halvparten av alle vidaregåande skular i Noreg.

(Kilde: Kommunal- og regionaldepartementet)

Kommentarer